Crime news: మహిళపై సామూహిక అత్యాచారం కేసు.. ఆరుగురికి జీవితఖైదు

హైదరాబాద్‌: మియాపూర్‌ పోలీస్‌ స్టేషన్‌ పరిధిలో రెండేళ్ల క్రితం జరిగిన అత్యాచారం కేసులో ఎల్బీనగర్‌ న్యాయస్థానం ఆరుగురికి జీవితఖైదు విధించింది. 2019 జనవరి 19న ఓ మహిళ కాలకృత్యాలు తీర్చుకోవడానికి హఫీజ్‌పేట రైల్వే స్టేషన్‌ సమీపంలోని పొదల్లోకి వెళ్లింది. సమీపంలో మద్యం సేవిస్తున్న ఏడుగురు ఆ మహిళపై అత్యాచారం చేశారు. బాధితురాలు ఫిర్యాదు చేయడంతో ఏడుగురు నిందితులను మియాపూర్‌ పోలీసులు అరెస్టు చేశారు. నిందితుల్లో ఓ మైనర్‌ కూడా ఉండటం గమనార్హం. 

ఎల్బీనగర్‌ న్యాయస్థానంలో తగిన ఆధారాలు, సాక్ష్యాలు సమర్పించడంతో విచారణ చేపట్టిన న్యాయమూర్తి.. నిందితులకు జీవితఖైదు విధిస్తూ తీర్పు వెలువరించారు. బాలనేరస్థుడికి సంబంధించిన కేసు న్యాయస్థానంలో పెండింగ్‌లో ఉంది. ఎల్బీనగర్‌ న్యాయస్థానం తీర్పుపై సైబరాబాద్‌ సీపీ సజ్జనార్‌ హర్షం వ్యక్తం చేశారు. కేసు దర్యాప్తును పర్యవేక్షించిన మాదాపూర్‌ డీసీపీ వెంకటేశ్వర్లు, ఏసీపీలు రవికుమార్‌, కృష్ణప్రసాద్‌లను సజ్జనార్‌ అభినందించారు.