Poison: రూ.1.5 కోట్ల విలువైన పాము విషం స్వాధీనం

భువనేశ్వర్‌, న్యూస్‌టుడే: పాము విషం విక్రయించేందుకు ప్రయత్నిస్తున్న ఇద్దరు నిందితులను ఒడిశా పోలీసులు అరెస్టు చేశారు. దేవ్‌గఢ్‌ జిల్లా తరంగ్‌ గ్రామంలో ఈ ఘటన చోటుచేసుకుంది. పోలీసులు తెలిపిన వివరాల ప్రకారం.. పాము విషం విక్రయిస్తున్నారన్న సమాచారంతో శనివారం పోలీసులు దాడి చేశారు. రూ.1.5 కోట్ల విలువైన ఒక లీటరు విషం స్వాధీనం చేసుకున్నారు. ఈ కేసులో సంబల్‌పూర్‌ జిల్లాలోని సఖిపడకు చెందిన రంజన్‌ కుమార్‌ పాఢి, సింధూరపంకకు చెందిన కైలాస్‌ సాహులను అరెస్టు చేశారు. ఆ విషాన్ని ఎక్కడ సేకరించారు? ఎక్కడికి రవాణా చేస్తున్నారన్న దానిపై దర్యాప్తు చేస్తున్నారు.