Suicide: మీర్‌పేట్‌లో విషాదం.. ఫోన్‌లో గేమ్స్‌ ఆడొద్దన్నందుకు విద్యార్థిని ఆత్మహత్య

బాలాపూర్‌: చరవాణి ఎక్కువగా వినియోగిస్తున్నావంటూ తండ్రి మందలించడంతో మనస్తాపం చెందిన కుమార్తె ఆత్మహత్య చేసుకున్న ఘటన నగరంలోని మీర్‌పేట్‌ పోలీసు స్టేషన్‌ పరిధిలో చోటు చేసుకుంది. పోలీసుల కథనం ప్రకారం.. మీర్‌పేట్‌ సర్వోదయ నగర్‌ కాలనీలో నివాసం ఉంటున్న ఓ వ్యక్తికి ముగ్గురు పిల్లలు ఉన్నారు. మొదటి కుమార్తె (17) ఇంటర్మీడియట్‌ చదువుతోంది. ఆదివారం రాత్రి ఫోన్‌లో గేమ్స్‌ ఆడుతుండగా తండ్రి ఆమెను మందలించాడు. దీంతో మనస్తాపానికి గురైన విద్యార్థిని రాత్రి తన గదిలోని ఫ్యాన్‌కు ఉరేసుకొని బలవన్మరణానికి పాల్పడింది. ఉదయం ఎంతసేపటికీ తలుపు తీయకపోవడంతో కిటికీ అద్దాలను పగులగొట్టి చూడగా ఫ్యాన్‌కు వేలాడుతూ కనిపించింది. కుటుంబ సభ్యులు మీర్‌పేట్‌ పోలీసులకు సమాచారం అందించారు. బాధితుల ఫిర్యాదు మేరకు కేసు నమోదు చేసి దర్యాప్తు చేపట్టినట్లు ఇన్‌స్పెక్టర్‌ మహేందర్‌ రెడ్డి తెలిపారు.