crime news: సెల్‌ఫోన్లు చోరీ చేసి.. సీసీ కెమెరాలో చిక్కి

హైదరాబాద్‌: మొబైల్‌ స్టోర్‌లో సెల్‌ఫోన్‌లు చోరీకి గురైన ఘటన సికింద్రాబాద్‌ కార్ఖానా పోలీస్‌స్టేషన్‌ పరిధిలో ఆలస్యంగా వెలుగు చూసింది.  నిన్న రాత్రి సంగీత మొబైల్‌ స్టోర్‌లోకి చొరబడిన గుర్తుతెలియని వ్యక్తులు సెల్‌ఫోన్ల చోరీకి పాల్పడ్డారు. రూ.15లక్షల విలువైన సెల్‌ఫోన్లు అపహరించుకుని వెళ్లిపోయారు. ఉదయాన్నే మొబైల్‌ స్టోర్‌కి వచ్చిన యజమాని చోరీ జరిగిన తీరు చూసి షాక్‌కు గురయ్యారు. రూ.లక్షల విలువైన సెల్‌ఫోన్లు చోరీకి గురవడంతో వెంటనే కార్ఖానా పోలీసులను ఆశ్రయించారు. ఘటనాస్థలికి చేరుకున్న పోలీసులు క్లూస్‌టీమ్‌ సాయంతో వేలిముద్రలు సేకరించారు. సీసీటీవీ ఫుటేజీ ఆధారంగా దర్యాప్తు ప్రారంభించారు. గుర్తుతెలియని ఐదుగురు వ్యక్తులు సెల్‌ఫోన్లు చోరీ చేస్తున్న దృశ్యాలు సీసీ కెమెరాల్లో రికార్డయ్యాయి. పక్కా ప్రణాళికతో దొంగల ముఠా సెల్‌ఫోన్‌లు చోరీ చేసినట్టు పోలీసులు గుర్తించారు. దొంగల ముఠా కోసం గాలింపు కొనసాగుతోంది.