Crime News : పులివెందులలో దొంగల బీభత్సం.. 

పులివెందుల: కడప జిల్లా పులివెందులలో దొంగలు బీభత్సం సృష్టించారు. మూడు చోట్ల చోరీలకు పాల్పడ్డారు. స్థానిక భాకరాపురంలోని పాల కేంద్రం సమీపంలో నివసిస్తున్న లక్ష్మీదేవి అనే మహిళ ఇంట్లోకి చొరబడిన దుండగులు.. ఆమెను కత్తితో బెదిరించి కాళ్లు, చేతులు కట్టేశారు. ఆపై ఆమె చెవి దుద్దులు, బంగారు గొలుసు, బీరువాలో ఉన్న రూ.75వేల నగదు దోచుకెళ్లారు. అనంతరం ఆ ఇంటి సమీపంలో నిలిపి ఉంచిన రెండు ద్విచక్ర వాహనాలను కొంతదూరం వరకు తీసుకెళ్లి మధ్యలోనే వదిలి వెళ్లిపోయారు.

వీటితో పాటు పట్టణంలోని పార్నపల్లె రోడ్డు మార్గంలోని ఓ దుకాణంలో చోరీకి విఫలయత్నం చేశారు. గమనించిన స్థానికులు కేకలు వేయడంతో అక్కడి నుంచి పరారయ్యారు. సమాచారం అందుకున్న పోలీసులు లక్ష్మీదేవి ఇంటికి వెళ్లి పరిశీలించి ఆమెను విచారించారు. బాధితురాలి ఫిర్యాదు మేరకు కేసు నమోదు చేసి దర్యాప్తు చేపట్టినట్లు ఎస్సై చిరంజీవి తెలిపారు.