Crime news: గుంటూరు జిల్లాలో మాజీ సైనికుడి కాల్పులు: ఇద్దరి మృతి

మాచర్ల: గుంటూరు జిల్లా మాచర్ల మండలం రాయవరంలో మాజీ సైనికుడు దారుణానికి ఒడిగట్టాడు. పొలం తగాదా విషయంలో ఘర్షణ తలెత్తి సాంబశివరావు అనే మాజీ సైనికుడు జరిపిన కాల్పుల్లో ఇద్దరు రైతులు మృతి చెందారు. వివరాల్లోకి వెళితే.. పొలం వివాదం నేపథ్యంలో ఆదివారం రాత్రి దాయాదుల మధ్య ఘర్షణ జరిగింది. ఈక్రమంలో కోపోద్రిక్తుడైన మాజీ సైనికుడు మట్టా సాంబశివరావు తన వద్ద ఉన్న పిస్తోల్‌తో దగ్గర నుంచి ఎనిమిది రౌండ్లు కాల్పులు జరిపాడు. మట్టా శివ, బాలకృష్ణ, ఆంజనేయులు తల, శరీర భాగాల్లోకి బుల్లెట్లు దూసుకెళ్లాయి. తీవ్రంగా గాయపడిన వారిని మాచార్ల ప్రభుత్వ ఆసుపత్రికి తరలించారు. అప్పటికే శివ, బాలకృష్ణ మృతి చెందినట్టు వైద్యులు నిర్ధారించారు. ఆంజనేయులును మెరుగైన చికిత్స కోసం గుంటూరు ఆసుపత్రికి తరలించారు. ఘటనాస్థలికి చేరుకున్న పోలీసులు కేసు నమోదు చేసి దర్యాప్తు చేపట్టారు. కాల్పుల ఘటనతో రాయవరం గ్రామం ఒక్కసారిగా ఉలిక్కిపడింది. స్థానికులు తీవ్ర భయాందోళనకు గురయ్యారు.