Road Accident: నల్గొండ జిల్లాలో రెండు వేర్వేరు రోడ్డు ప్రమాదాలు.. ఐదుగురు మృతి

కట్టంగూర్‌: నల్గొండ జిల్లా కట్టంగూర్‌ మండలం ముత్యాలమ్మ గూడెం శివారులో జరిగిన రెండు వేర్వేరు ప్రమాదాల్లో ఐదుగురు వ్యక్తులు మృతిచెందారు. వివరాల్లోకి వెళితే.. ఒంగోలు జిల్లా చీమకుర్తి మండలం అయ్యపురాజుపాలెంకు చెందిన కదిరి గోపాల్‌రెడ్డి (31) రాజస్థాన్‌ రాష్ట్రంలో మైనింగ్‌శాఖలో ఉద్యోగం చేస్తున్నారు. భార్య రచన(31), కూతురు రియాన్సితో అక్కడ 9ఏళ్లుగా నివసిస్తున్నారు. దక్షిణాఫ్రికా రాష్ట్రంలో ఉద్యోగం రావడంతో రాజస్థాన్‌లోని ఉద్యోగానికి రాజీనామా చేసి తన స్నేహితుడు ప్రశాంత్‌తో కలిసి అంతా హైదరాబాద్‌ నుంచి విజయవాడకు కారులో బయలుదేరారు. కట్టంగూరు వద్దకు రాగానే వీరు ప్రయాణిస్తున్న వాహనం అదుపుతప్పి ముందున్న కంటైనర్‌ లారీని బలంగా ఢీకొని.. ఆపై రోడ్డు పక్కన చెట్టును ఢీకొంది. ఈ ప్రమాదంలో గోపాల్‌రెడ్డి, ప్రశాంత్‌ అక్కడికక్కడే మృతిచెందారు. తీవ్రంగా గాయపడిన రచన ఆస్పత్రిలో చికిత్స పొందుతూ మృతిచెందింది. చిన్నారి రియాన్సీ స్వల్పగాయాలతో చికిత్స పొందుతోంది.

మరో ప్రమాదం.. ఇద్దరు మృతి

చెట్టు ఢీకొట్టిన కారులో రచన, రియాన్సీ ఇరుక్కుపోయారు. పోలీసులు సహాయక చర్యలు చేపట్టడంతో ఈ రోడ్డుపై రాకపోకలు నిలిచిపోయాయి. ఇదే సమయంలో హైదరాబాద్‌ నుంచి సూర్యాపేటకు బయలుదేరిన జంగం శివప్రసాద్‌ (23), రోమాల వినయ్‌(21)లు ప్రయాణిస్తున్న కారు.. రోడ్డు ప్రమాదం కారణంగా ట్రాఫిక్‌ జామ్‌లో ఇరుక్కుపోయిన లారీని వెనుక నుంచి బలంగా ఢీకొంది. ఈ ప్రమాదంలో జంగం శివప్రసాద్‌ ఆస్పత్రిలో చికిత్స పొందుతూ మృతిచెందగా.. వినయ్‌ అక్కడికక్కడే మృతిచెందాడు. వీరిద్దరూ కారులో సూర్యాపేటలోని ఓ ఆశ్రమంలో నిర్వహిస్తున్న రుద్రాభిషేకానికి హాజరవుతున్నారు. సీఐ నాగదుర్గా ప్రసాద్‌, ఎస్సై శివప్రసాద్‌ కేసు నమోదు చేసుకొని దర్యాప్తు చేస్తున్నారు.