TS News: ట్రయల్‌రూంలో యువతి డ్రెస్‌ మార్చుకుంటుండగా వీడియో..!

జూబ్లీహిల్స్‌లో ఇద్దరు పోకిరీలు, స్టోర్‌ మేనేజర్‌ అరెస్ట్

జూబ్లీహిల్స్‌: పోకిరీల చేష్టలు రోజురోజుకీ మితిమీరిపోతున్నాయి. హైదరాబాద్‌ జూబ్లీహిల్స్‌లోని హెచ్‌ అండ్‌ ఎం షాపింగ్‌మాల్‌ ట్రయల్‌రూంలో యువతి దుస్తులు మార్చుకుంటుండగా ఇద్దరు యువకులు వీడియో తీశారు. గమనించిన యువతి మొదట కేకలు వేయడంతో అక్కడున్నవారు యువకులను పట్టుకున్నారు. అనంతరం డయల్‌ 100 ద్వారా సమాచారం అందుకున్న పోలీసులు అక్కడికి చేరుకుని నిందితులను అదుపులోకి తీసుకున్నారు. ఈ క్రమంలో యువతి ఆ వీడియోను డిలీట్‌ చేయించారు. వీడియో తీసిన మొబైల్‌ను పోలీసులు స్వాధీనం చేసుకున్నారు. ఇద్దరు యువకులతో పాటు స్టోర్‌ మేనేజర్‌ ఆమన్‌పై జూబ్లీహిల్స్‌ పోలీసులు కేసు నమోదు చేసి అరెస్ట్‌ చేశారు. యువకుల చరవాణిలో ఇలాంటి దృశ్యాలు మరికొన్ని ఉన్నట్లు పోలీసులు గుర్తించారు. ఈ దృశ్యాలను ఎక్కడైనా చిత్రీకరించారా.. లేకపోతే అంతర్జాలం నుంచి డౌన్‌లోడ్‌ చేసుకున్నారా అనే వివరాలను పోలీసులు సేకరిస్తున్నారు.