Ap news: యువతిపై పెట్రోల్‌ దాడి కేసులో నిందితుడి అరెస్టు

విజయనగరం: జిల్లాలోని పూసపాటిరేగ మండలం చౌడువాడలో యువతిపై పెట్రోల్‌ పోసి నిప్పంటించిన ఘటనలో నిందితుడు పోలీసులకు చిక్కాడు. శుక్రవారం సాయంత్రం జిల్లా ఎస్పీ దీపిక పాటిల్‌ ... నిందితుడిని మీడియా ఎదుట ప్రవేశపెట్టారు. నిందితుడు సరవ గ్రామానికి చెందిన రాంబాబుగా గుర్తించామని, కృష్ణాపురం గ్రామంలో అతడ్ని అరెస్టు చేసినట్టు చెప్పారు. నిందితుడిపై 307 సెక్షన్‌ కింద కేసు నమోదుచేశామని, ఇతరుల పాత్రపైనా విచారణ చేస్తున్నామని వెల్లడించారు. యువతిపై దాడి కోసం పెట్రోల్‌ను ఓ ద్విచక్రవాహనం నుంచి తీసినట్టు నిందితుడు అంగీకరించాడని తెలిపారు. పెళ్లి కుదిరినప్పటి నుంచి ఇద్దరి మధ్య నెలకొన్న అనుమానాలే హత్యాయత్నానికి దారితీశాయని వెల్లడించారు. ఈకేసులో మరికొంతమంది అనుమానితులను విచారించాల్సి ఉందన్నారు. ఘటనపై తక్షణం పోలీసులకు సమాచారం రావటం, బాధితులకు సకాలంలో వైద్యసేవలు అందటంలో దిశ యాప్‌ ప్రముఖ పాత్ర పోషించిందని ఎస్పీ చెప్పారు. దాడిని అడ్డుకోబోయిన యువతి అక్క, ఆమె కుమారుడికి కూడా మంటలు అంటుకున్నాయని, ముగ్గురు బాధితులకు విజయనగరం జిల్లా ఆసుపత్రిలో చికిత్స అందిస్తున్నట్టు తెలిపారు.