TS NEWS: తీన్మార్‌ మల్లన్నను 5గంటల పాటు విచారించిన పోలీసులు

సికింద్రాబాద్‌: చిలకలగూడ పోలీస్‌స్టేషన్‌లో తీన్మార్‌ మల్లన్నను పోలీసులు 5గంటల పాటు విచారించారు. అనంతరం విడుదల చేశారు. ఈనెల 8న మరోసారి విచారణకు హాజరు కావాలని తెలిపారు. పోలీసుల విచారణకు సహకరిస్తానని ఈ సందర్భంగా మల్లన్న స్పష్టం చేశారు.

తన ప్రతిష్ఠకు భంగం కలిగించిన తీన్మార్‌ మల్లన్న అలియాస్‌ చింతపండు నవీన్‌పై ఓ యువతి హైదరాబాద్‌ సైబర్‌ క్రైమ్‌ పోలీసులకు ఫిర్యాదు చేశారు. తన సహోద్యోగి, స్నేహితుడైన చిలక ప్రవీణ్‌ గత కొంతకాలంగా తీన్మార్‌ మల్లన్న అవినీతి అక్రమాలను బయటపెట్టే ప్రయత్నం చేస్తున్నారని, అందుకే తన ప్రతిష్ఠకు భంగం వాటిల్లేలా మల్లన్న వ్యవహరిస్తున్నారని బాధిత యువతి ఫిర్యాదులో పేర్కొన్నారు. ఈ నేపథ్యంలో పీర్జాదిగూడలోని తీన్మార్‌ మల్లన్న యూట్యూబ్‌ ఛానల్‌పై పోలీసులు మంగళవారం రాత్రి ఆకస్మికంగా దాడి చేశారు. ఒక్కొక్కరుగా కార్యాలయానికి చేరుకున్న పోలీసులు కార్యాలయ సిబ్బందిని బయటకు వెళ్లకుండా కట్టడి చేశారు. కార్యాలయంలో సోదాలు నిర్వహించారు. పలు పత్రాలు పరిశీలించి, హార్డ్‌ డిస్క్‌లు స్వాధీనం చేసుకున్నారు.