AP News: రూ. కోటిన్నర అప్పు చేసిన అన్న.. తమ్ముడు, తల్లిదండ్రులు బలవన్మరణం 

పుత్తూరు: అప్పుల బాధతో ఒకే కుటుంబంలో ముగ్గురు ఆత్మహత్యకు పాల్పడిన ఘటన చిత్తూరు జిల్లా పుత్తూరు మున్సిపాలిటీ పరిధిలోని రాచపాలెం గ్రామంలో చోటు చేసుకుంది. పోలీసులు తెలిపిన వివరాల మేరకు.. శంకరయ్య(55), గురువమ్మ(50) దంపతుల పెద్దకుమారుడు సతీష్‌  తనకు పరిచయం ఉన్న వ్యక్తుల వద్ద రూ.కోటిన్నరకు పైగా అప్పు చేశాడు. అప్పు ఇచ్చిన వాళ్లు ఇంటికి వచ్చి డబ్బులు తిరిగి ఇవ్వమని అడగటంతో సతీష్‌ ఇంటి నుంచి పారిపోయాడు.

దీంతో మనస్తాపానికి గురైన శంకరయ్య, గురవమ్మ.. వాళ్ల చిన్న కుమారుడు వినయ్‌(25) పురుగుల మందు తాగి ఆత్మహత్య చేసుకున్నారు. గమనించిన స్థానికులు పోలీసులకు సమాచారం అందించడంతో వారు ఘటనా స్థలికి చేరుకొని పరిశీలించారు. ఘటనపై కేసు నమోదు చేసి దర్యాప్తు చేస్తున్నారు.