Crime News: ఓఆర్‌ఆర్‌పై ప్రమాదం.. ముగ్గురి మృతి, ఇద్దరి పరిస్థితి విషమం

శంషాబాద్‌: రంగారెడ్డి జిల్లాలోని ఔటర్‌రింగ్‌ రోడ్డుపై ఘోర ప్రమాదం జరిగింది. శంషాబాద్‌ మండలం పెద్ద గోల్కొండ వద్ద ఆగి ఉన్న లారీని కారు అదుపుతప్పి ఢీ కొట్టింది. ఈ దుర్ఘటనలో కారులో చిక్కుకొని ముగ్గురు అక్కడికక్కడే మృతి చెందారు. మరో ఇద్దరి పరిస్థితి విషమంగా ఉండటంతో వారిని శంషాబాద్‌లోని ఓ ప్రైవేటు ఆస్పత్రికి తరలించారు. మృతులను మహారాష్ట్రకు చెందిన వారిగా పోలీసులు గుర్తించారు. సంఘటన స్థలానికి చేరుకున్న ఔటర్ రింగ్ రోడ్డు సిబ్బంది.. కారులో ఇరుక్కుపోయిన మృతదేహాలను వెలికితీశారు. శవపరీక్ష నిమిత్తం మృతదేహాలను ఉస్మానియా ఆస్పత్రికి తరలించారు. ఈ మేరకు ఘటనపై కేసు నమోదు చేసిన శంషాబాద్‌ పోలీసులు దర్యాప్తు చేపట్టారు. బాధితులు హయత్‌నగర్‌ నుంచి శంషాబాద్‌ వైపు వెళ్తుండగా ఈ ప్రమాదం జరిగినట్లు తెలుస్తోంది.