Crime news: ఘోరం: భార్య, నలుగురు పిల్లల్ని చంపి.. వ్యక్తి ఆత్మహత్య‌!

తిరువన్నామలై: తమిళనాడులో దారుణం చోటుచేసుకుంది. భార్య, ఇద్దరు టీనేజ్‌ కుమార్తెలతో పాటు మొత్తం ఐదుగురు కుటుంబ సభ్యుల్ని చంపిన ఓ వ్యక్తి ఆపై తానూ ఆత్మహత్యకు పాల్పడిన ఉదంతం తిరువణ్ణామలై జిల్లాలో కలకలం రేపింది. పోలీసులు తెలిపిన వివరాల ప్రకారం.. ఆత్మహత్యకు పాల్పడిన వ్యక్తి చెంగమ్‌ తాలుకా ఒరంత్వాడీ గ్రామానికి చెందిన పళనిస్వామి (45)గా గుర్తించారు. అతడు వ్యవసాయ కూలీగా పనిచేస్తూ జీవనం కొనసాగిస్తున్నాడు. ఈ ఘాతుకానికి గల కారణాలు స్పష్టంగా తెలియకపోయినప్పటికీ.. కుటుంబంలో తగాదాలే కారణమై ఉండొచ్చని పోలీసులు అనుమానిస్తున్నారు. ఇరుగుపొరుగు వారికి అనుమానం వచ్చి పోలీసులకు సమాచారం ఇవ్వడంతో ఈ విషాద ఘటన వెలుగులోకి వచ్చింది. పోలీసులు ఇంటికి చేరుకొని చూడగా పళనిస్వామి ఇంటిపై కప్పునకు ఉరివేసుకొని ఉండగా.. అతడి భార్య (37), ముగ్గురు కుమార్తెలు, కొడుకు విగతజీవులుగా పడి ఉన్నట్టు గుర్తించారు. మరో కుమార్తె (9) గాయాలతో పడి ఉండగా ఆమెను చికిత్స నిమిత్తం ఆస్పత్రికి తరలించినట్టు పోలీసులు తెలిపారు. ఈ దారుణ ఘటనకు దారితీసిన కారణాలు తెలుసుకొనేందుకు అన్ని కోణాల్లో దర్యాప్తు చేస్తున్నట్టు పోలీసులు వెల్లడించారు.