Hyderabad: పాతబస్తీలో ఆర్టీసీ బస్సు బీభత్సం.. నలుగురికి గాయాలు

హైదరాబాద్‌: నగరంలోని పాతబస్తీలో పెను ప్రమాదం తప్పింది. జూపార్కు నుంచి పురానాపూల్‌ వైపు వెళ్తున్న ఆటోను బహదూర్‌పురా క్రాస్‌ రోడ్డు సిగ్నల్‌ వద్ద వెనుక నుంచి ఆర్టీసీ బస్సు ఢీ కొట్టింది. ఈ ఘటనలో ఆటోలో ఉన్న నలుగురికి గాయాలయ్యాయి. క్షతగాత్రులను దగ్గర్లోని ఓ ప్రైవేటు ఆస్పత్రికి తరలించి చికిత్స అందించారు. తీవ్రంగా గాయపడిన ఇద్దరిని ఉస్మానియా ఆస్పత్రిలో చేర్చారు. ఆర్టీసీ బస్సు రాజేంద్రనగర్‌ డిపోకి చెందినదిగా గుర్తించారు. సంఘటన స్థలాన్ని బహదూర్‌పురా సీఐ పరిశీలించారు. బస్సు బ్రేకులు ఫెయిల్‌ అవడం వల్లే ఈ ప్రమాదం జరిగిందని పోలీసులు తెలిపారు. బస్సు వేగంగా వచ్చి ఉంటే ప్రాణ నష్టం జరిగి ఉండేదని స్థానికులు ఆందోళన వ్యక్తం చేశారు.