రాజస్థాన్‌లో పడవ ప్రమాదం: 12మంది గల్లంతు

జైపూర్‌: రాజస్థాన్‌లోని ఖటోలీలో ఘోర పడవ ప్రమాదం చోటుచేసుకుంది. బుండి జిల్లాలోని కమలేశ్వర్‌ మహదేవ్‌ ఆలయానికి 40 మంది భక్తులతో వెళ్తున్న పడవ చంబల్‌ నదిలో మునిగిపోయింది. దీంతో పడవలో ఉన్న వారిలో దాదాపు 12 మంది గల్లంతు కాగా.. మరో 25 మంది సురక్షితంగా బయటపడ్డారు. కోట రూరల్‌ ఎస్పీ శరద్‌ చౌదరీ వెల్లడించిన వివరాల ప్రకారం.. బుండి జిల్లాలోని ఇందర్‌ఘర్‌ ప్రాంతంలో ఉన్న దేవస్థానానికి 40 మంది పడవలో బయలుదేరారు. చంబల్‌ నది గుండా వెళ్తుండగా ప్రమాదవశాత్తు పడవ నీట మునిగి పోవడంతో దాదాపు 12 మంది గల్లంతయ్యారు. మరో 25 మంది ఈదుకుంటూ సురక్షితంగా బయటపడ్డారు. గల్లంతైన వారి కోసం సహాయక చర్యలు కొనసాగుతున్నాయని ఎస్పీ తెలిపారు.