రెండు రైళ్లు ఢీకొని.. ఈజిప్ట్‌లో 32మంది మృతి! 

కైరో: ఈజిప్ట్‌లో ఘోర రైలు ప్రమాదం చోటుచేసుకుంది. దక్షిణ కైరోకి సమీపంలో రెండు పాసింజర్‌ రైళ్లు పరస్పరం ఢీకొట్టడంతో 32మంది మృత్యువాతపడ్డారు. ఈ ప్రమాదంలో 66మందికి గాయాలైనట్టు ఆరోగ్యశాఖ అధికారులు వెల్లడించారు. క్షతగాత్రులను ఆస్పత్రికి తరలించి చికిత్స అందిస్తున్నారు. దక్షిణ కైరోకు 460 కి.మీల దూరంలోని షోహాగ్‌లో ఈ దుర్ఘటన చోటుచేసుకుంది. రెండు రైళ్లు ఢీకొట్టడంతో నాలుగు బోగీలు బోల్తా పడటంతో ఈ ప్రమాదం జరిగినట్టు సమాచారం. ఘటనా స్థలానికి 36 అంబులెన్స్‌లు చేరుకున్నట్టు ఆరోగ్య మంత్రిత్వశాఖ అధికార ప్రతినిధి డాక్టర్‌ ఖలీద్‌ మెజాహెద్‌ వెల్లడించారు. సహాయక చర్యలు కొనసాగుతున్నట్టు చెప్పారు. పూర్తి సమాచారం ఇంకా తెలియాల్సి ఉంది.