Karimnagar: లింగనిర్ధరణ.. ఆస్పత్రిని సీజ్‌ చేసిన వైద్యాధికారులు

జమ్మికుంట: లింగనిర్ధరణ పరీక్షలు చేయడంతో కరీంనగర్‌ జిల్లా జమ్మికుంటలోని విజయసాయి ఆస్పత్రిని వైద్యారోగ్య శాఖ అధికారులు సీజ్ చేశారు. విశ్వసనీయ సమాచారంతో జమ్మికుంటలోని మూడు ప్రైవేటు ఆస్పత్రుల్లో జిల్లా వైద్యాధికారిణి లలితాదేవి ఆధ్వర్యంలో 3 బృందాలు తనిఖీలు నిర్వహించాయి. విజయసాయి ఆస్పత్రిలో ఓ మహిళకు లింగనిర్ధరణ పరీక్షలు చేసి గర్భవిచ్ఛిత్తి (అబార్షన్‌) చేశారని తేలడంతో అధికారులు ఈ చర్యలు తీసుకున్నారు. అంతేకాకుండా ఆస్పత్రి రిజిస్ట్రేషన్‌ను రద్దు చేసినట్లు వైద్యారోగ్యశాఖ వెల్లడించింది. లింగ నిర్ధరణకు ఉపయోగించిన ఆల్ట్రా సౌండ్‌ స్కానింగ్‌ యంత్రాన్ని అధికారులు సీజ్‌ చేశారు. ఆస్పత్రిలో రోగులను చేర్చుకోవద్దంటూ నోటీసులు జారీ చేశారు.