Horror incident: బెంగళూరులో భయానక ఘటన.. డ్రమ్ములో మహిళ మృతదేహం

బెంగళూరు: బెంగళూరులో అత్యంత భయానకమైన ఘటన(Bengaluru Horror) వెలుగులోకి వచ్చింది. యశ్వంత్‌పూర్‌ రైల్వేస్టేషన్‌లోని 1వ నంబర్‌ ప్లాట్‌ఫాం వద్ద ఓ డ్రమ్ములో కుళ్లిపోయిన దశలో ఉన్న మహిళ మృతదేహాన్ని గుర్తించడం తీవ్ర కలకలం రేపింది. ఈ ఉదయం రైల్వే స్టేషన్‌ను శుభ్రంచేసే సిబ్బంది డ్రమ్మును గుర్తించి.. అందులోంచి దుర్వాసన రావడంతో పోలీసులను అప్రమత్తం చేశారు. దీంతో వారు వచ్చి పరిశీలించగా.. కుళ్లిన స్థితిలో ఉన్న మహిళ మృతదేహం ఉన్నట్టు గుర్తించారని బెంగళూరు డివిజన్‌ అదనపు డీఆర్‌ఎం కుసుమా హరిప్రసాద్‌ తెలిపారు. డ్రమ్ములో మృతదేహంపై బట్టలు కప్పి ఉన్నాయని పోలీసులు తెలిపారు. అయితే, పాలిథీన్‌ కవర్‌లో ఆమె శవాన్ని చుట్టి ఆ తర్వాత డ్రమ్ములో కుక్కినట్టు పోలీసులు అనుమానిస్తున్నారు. ఘటనా స్థలానికి చేరుకున్న ఫోరెన్సిక్‌ నిపుణులు ఆ ప్రాంతంలో ఆధారాల కోసం అన్వేషిస్తున్నారు. మహిళ వయస్సు 20ఏళ్లకు పైగా ఉంటుందని భావిస్తున్న పోలీసులు.. ఆమెకు సంబంధించిన వివరాలు సేకరించే పనిలో నిమగ్నమయ్యారు. ఐదు రోజుల క్రితమే మహిళను చంపి డ్రమ్ములో కుక్కి ఉంటారని అనుమానిస్తున్నారు.