పోలీసు శాఖలో కొవిడ్‌ కలవరం

గుంటూరు, న్యూస్‌టుడే : కొవిడ్‌ మహమ్మారి పోలీసుశాఖను కలవరపెడుతోంది. శాంతిభద్రతల పరిరక్షణ, ట్రాఫిక్‌ నియంత్రణ, బందోబస్తు విధులకు హాజరవుతున్న క్రమంలో పోలీసు సిబ్బంది పలువురు దాని బారిన పడుతున్నారు. ఇప్పటికే పలువురు సీఐలు, ఎస్సైలతోపాటు సిబ్బందికి పాజిటివ్‌ రావడంతో ఆందోళన చెందుతున్నారు. ఒక పోలీసుస్టేషన్‌లోనే ఆరుగురికి కరోనా నిర్ధారణ అయ్యింది. మూడు రోజుల నుంచి ప్రతి రోజు ఆ శాఖలోని పది నుంచి 20 మంది కొవిడ్‌ బారిన పడుతున్నారు. ఇప్పటి వరకు జిల్లా వ్యాప్తంగా 100 మంది వరకు చికిత్స తీసుకుంటున్నట్లు సమాచారం. దీని ప్రభావం అంతకంతకు పెరుగుతుండటంతో ప్రతి పోలీసుస్టేషన్‌ను రోజూ శానిటైజ్‌ చేయించాలని, సిబ్బంది తప్పనిసరిగా మాస్కు ధరించాలని అర్బన్, రూరల్‌ ఎస్పీలు ఆరిఫ్‌ హఫీజ్, విశాల్‌గున్నీ ఆదేశాలు జారీ చేశారు. విధులు నిర్వహించే క్రమంలో వ్యక్తిగత జాగ్రత్తలు తీసుకోవాలని సూచిస్తున్నారు. కరోనా బారిన పడిన వారి వివరాలను ఎప్పటికప్పుడు తెలుసుకొని వారికి అన్నిరకాల వైద్య సేవలందించాలని ఎస్పీలు ఆదేశించారు. ఎప్పుడు ఎటువంటి అవసరం వచ్చినా వెంటనే తమను సంప్రదించాలని సూచించారు.