అయ్యో. శిరీషా.. ఎంత కష్టమొచ్చె!

సాయం కోసం విద్యార్థిని వేడుకోలు

ఏడాదిగా మంచానికే పరిమితం

కౌటాల గ్రామీణం, న్యూస్‌టుడేః రెక్కాడితే గానీ డొక్కాడని పేద కుటుంబం వారిది.. ఉన్న ఒక్క ఎకరం భూమిలోనే వరి పండించుకొని కూలీ, నాలీ చేస్తే గానీ కుటుంబపోషణ గడవని దయనీయ పరిస్థితి వారిది. తమ పిల్లలను ప్రయోజకులను చేయాలనుకున్న ఆ తల్లిదండ్రులకు తమ కళ్లముందే అమ్మాయి వింత వ్యాధితో జీవచ్ఛవంలా పడి ఉండడం తీరని దుఖాన్ని మిగుల్చుతోంది. కుమురం భీం జిల్లా కౌటాల మండలం ముత్తంపేట గ్రామానికి చెందిన గాడి దుర్గయ్య, చంద్రకళకు నలుగురు సంతానం. రెండో కుమార్తె శిరీష కౌటాల ప్రభుత్వ జూనియర్‌ కళాశాలలో ఇంటర్‌ పూర్తిచేసింది. ఇంటర్మీడియట్‌ ద్వితీయ సంవత్సరంలో శిరీషకు జ్వరం రావడంతో కుటుంబీకులు ఆమెను స్థానికంగా ఉన్న ఆసుపత్రుల్లో చూపించారు. రోజులు గడుస్తున్న కొద్ది ఆమె తలపై ఉన్న వెంట్రుకలు ఊడిపోవడం, చర్మంపై పుండ్లు, మోకాళ్లు, మోచేతులు ఎర్రబారిపోవడంతో పాటు శిరీషను చూస్తేనే భయమేసే విధంగా మారడంతో తండ్రి దుర్గయ్య రూ.50వేలు అప్పుచేసి బిడ్డను కరీంనగర్‌, హైదరాబాద్‌ ఆసుపత్రుల్లో చికిత్స చేయించారు. ఈ ఏడాది మార్చిలో హైదరాబాద్‌లోని నిమ్స్‌ ఆసుపత్రి వైద్యులు శిరీషకు లుపీస్‌ వ్యాధి అని నిర్ధారించారు. అయితే రోజురోజుకు శిరీష పరిస్థితి మరింత దయనీయంగా మారుతోంది. మంచం దిగి కింద అడుగువేయలేని పరిస్థితి. ఒళ్లంతా పుండ్లు, నొప్పులతో బాధపడుతున్న తమ బిడ్డ కనీసం అన్నం కూడా తినలేని పరిస్థితిని చూసి ఆ తల్లిదండ్రులు కన్నీరుమున్నీరవుతున్నారు. అన్నీ పనులు మరిచి బిడ్డను కంటికి రెప్పలా కాపాడుకుంటున్నారు. దాతల సాయం కోసం ఆ కుటుంబం ఎదురుచూస్తోంది.