దయచేసి మారండి.. దర్జాగా వెళ్లండి!

ఈనాడు, ఆదిలాబాద్‌: ఆదిలాబాద్‌ కలెక్టరేట్‌ చౌక్‌లో గురువారం ఉదయం ట్రాఫిక్‌ పోలీసులు వాహనాల నెంబర్‌ బోర్డులు, చలానాలపై తనిఖీలు నిర్వహించారు. రిమ్స్‌ మీదుగా వేగంగా వస్తున్న వాహనదారులు ఎదురుగా ఉన్న పోలీసులను చూసి ఒక్కసారిగా ఆగిపోవడంతో వెనుకనే వస్తున్న వాహనదారులు ఇబ్బంది పడ్డారు. మరికొందరు వెనుక ఎవరైనా వస్తున్నారా అని చూడకుండా అకస్మాత్తుగా మలుపుతిప్పడంతో చిన్నచిన్న ప్రమాదాలకు గురయ్యారు. మరోవైపు అన్నీ సరిగ్గా ఉన్న చోదకులు నేరుగా దర్జాగా వెళ్లారు. పోలీసులను చూసి భయపడి, ప్రమాదాలకు గురికాకుండా ఇప్పటికైనా వాహనదారులు నెంబరు బోర్డులు సరిచేసుకొని, శిరస్త్రాణం ధరిస్తే సాఫీగా వెళ్లొచ్చు.