నిరాశ పరిచిన రైల్వే బడ్జెట్

ఊసే లేని ఆదిలాబాద్‌ - ఆర్మూర్‌ మార్గం

ఎదులాపురం, న్యూస్‌టుడే : ఆదిలాబాద్‌ జిల్లాకు రైల్వే బడ్జెట్లో కేంద్రం మళ్లీ మొండి చేయే చూపించింది. ఆదిలాబాద్‌ - ఆర్మూర్‌ రైలు మార్గం నిర్మాణానికి నిధులు ఈ ఏడాదైనా కేటాయిస్తారని జిల్లావాసులు ఆశపడ్డారు. జిల్లా నుంచి భాజపా తరఫున ఎన్నికైన ఎంపీ సోయం బాపురావు సైతం ఆర్మూర్‌ - ఆదిలాబాద్‌ లైన్‌కు నిధులు కేటాయించాలని రైల్వే మంత్రి, అధికారులను కలిసి విన్నవించారు. ఈ బడ్జెట్లో కచ్చితంగా ఈ రైలు మార్గం నిర్మించటానికి నిధులు మంజూరవుతాయని భరోసా కల్పించారు. కానీ దీని ప్రస్తావన బడ్జెట్లో లేకపోవటంతో తీరని కలగానే మిగిలింది.  ఈ లైన్‌ మంజూరై పూర్తయితే జిల్లావాసులకు హైదరాబాద్‌ వెళ్లటానికి దూరభారం తగ్గుతుంది. గుడిహత్నూర్‌, ఇచ్చోడ, నేరడిగొండ, బజార్‌ హత్నూర్‌ మండలవాసులకు రైలు మార్గం సౌకర్యం కలిగేది. ఇదిలా ఉండగా ఆదిలాబాద్‌కు కనీసం ఏ ఒక్క రైలును సైతం ప్రకటించలేదు. ఆదిలాబాద్‌ పట్టణంలో నిర్మించనున్న రెండు రైల్వే వంతెనలకు రాష్ట్ర ప్రభుత్వం వాటాను సైతం కేంద్రమే భరిస్తుందని నాయకులు ప్రకటనలు చేశారు. కానీ ఈ నిధుల కేటాయింపు ప్రస్తావనే లేదు. కేవలం 2017-18 సంవత్సరంలో రూ.325 కోట్లతో మంజూరైన 246 కిలో మీటర్ల దూరానికి పింపల్‌కుట్టి-ముద్కేడ్‌, పర్భని, పర్లి, వైజానాథ్‌ సెక్షన్‌ల విద్యుదీకరణకు రూ.132.33 కోట్లు కేటాయించి చేతులు దులుపుకొంది. ఈ సెక్షన్‌లో ఇప్పటికే పింపల్‌కుట్టి-కోసాయి మధ్య 44 కిలో మీటర్ల దూరం విద్యుదీకరణ పూర్తయింది.