పాతవిధానంలో బియ్యం పంపిణీ

ఆదిలాబాద్‌ కలెక్టరేట్, న్యూస్‌టుడే : రాష్ట్రవ్యాప్తంగా చౌకధరల దుకాణాలకు బియ్యం పంపిణీ మొదలైంది. కొత్త విధానంలో తలెత్తిన సాంకేతిక సమస్యతో బియ్యం పంపిణీ నిలిచిపోయిన వైనంపై ఆదివారం ‘ఈనాడు’ ప్రధాన సంచికలో వార్త ప్రచురితమైన సంగతి తెలిసిందే. ఈ సమస్య కారణంగా కార్డుదారులకు బియ్యం పంపిణీ ఆలస్యం కానుందని ఆ కథనంలో ప్రస్తావించడంతో పౌర సరఫరాల సంస్థ ఎండీ అనిల్‌కుమార్‌ స్పందించారు. మండలస్థాయి నిల్వ కేంద్రాల నుంచి ఇది వరకు అమల్లో ఉన్న పాత విధానంలోనే బియ్యం చౌకధర దుకాణాలకు పంపించాలని మౌఖిక ఆదేశాలు జారీ చేశారు. కార్డుదారులకు ఈ నెల 8వ తేదీ నుంచి బియ్యం పంపిణీ ప్రారంభించాలని సూచించారు. ఈ విషయాన్ని ఆదిలాబాద్‌ జిల్లా పౌర సరఫరాల సంస్థ మేనేజరు సుధారాణి, పౌర సరఫరాల అధికారి టి.కిరణ్‌కుమార్‌ ధ్రువీకరించారు. తాజా ఆదేశాలతో ఆదివారం రాష్ట్రవ్యాప్తంగా ఎంఎల్‌ఎస్‌ పాయింట్ల నుంచి బియ్యం పంపిణీ మొదలైంది. ఇదిలా ఉంటే వచ్చే నెల కోటా నుంచి బియ్యం తీసుకునే సమయంలో డీలర్ల నుంచి వేలిముద్రలు తీసుకోవాలని నిర్ణయించారు.