ఎల్‌ఏడీసీసీ సేవలతో పేదలకు ప్రయోజనం

హైకోర్టు చీఫ్‌ జస్టిస్‌ ఉజ్జల్‌ భుయాన్‌ ప్రసంగాన్ని ప్రత్యక్ష ప్రసారంలో వింటున్న జిల్లా ప్రధాన న్యాయమూర్తి
ఎంఆర్‌ సునీత, బార్‌ అసోసియేషన్‌ అధ్యక్షుడు ఎన్రాల నగేష్‌, ఇతర న్యాయమూర్తులు

ఎదులాపురం, న్యూస్‌టుడే: న్యాయ సహాయ మండలి(ఎల్‌ఏడీసీసీ) ద్వారా పేదలకెంతో ప్రయోజనం కలుగుతుందని జిల్లా ప్రధాన న్యాయమూర్తి ఎంఆర్‌ సునీత పేర్కొన్నారు. హైకోర్టు నూతనంగా ప్రవేశ పెట్టిన ఈ విధానంలో సోమవారం హైకోర్టు చీఫ్‌ జస్టిస్‌ ఉజ్జల్‌ భుయాన్‌ రాష్ట్రంలోని పదహారు చోట్ల వర్చువల్‌ విధానంలో ఈ భవనాలను ప్రారంభించారు. ఇందులో భాగంగా ఆదిలాబాద్‌ కోర్టు ఆవరణలో నిర్మించిన ఎల్‌ఏడీసీసీ భవనానికి జిల్లా ప్రధాన న్యాయమూర్తి ఎంఆర్‌ సునీత రిబ్బను కత్తిరించి ప్రారంభించారు. ఈ సందర్భంగా న్యాయ సహాయ మండలి న్యాయవాదులుగా దాసరి గంగారాం, అరుగుల అశోక్‌, ఉమేష్‌ డోలే బాధ్యతలు చేపట్టారు. పేదరికం కారణంగా ఇబ్బందులు పడేవారికి న్యాయ సహాయం, సలహాలు ఈ మండలి న్యాయవాదులు అందించనున్నారు. ఈ కార్యక్రమంలో న్యాయమూర్తులు ప్రమీల జైన్‌, క్షమా దేశ్‌పాండె(డీఎల్‌ఎస్‌ఏ కార్యదర్శి), మంజుల సూర్యవార్‌, యశ్వంత్‌సింగ్‌ చౌహాన్‌, వినియోగదారుల ఫోరం అధ్యక్షుడు జాబేజ్‌ శామ్యుల్‌ బార్‌ అసోసియేషన్‌ అధ్యక్షుడు ఎన్రాల నగేష్‌, తదితరులు పాల్గొన్నారు.