సరస్వతీ క్షేత్ర పునర్నిర్మాణ పనులకు అంకురార్పణ నేడు

వివరాలను వెల్లడిస్తున్న ఈఓ విజయరామారావు

ముథోల్‌(బాసర), న్యూస్‌టుడే: నిర్మల్‌ జిల్లా బాసర సరస్వతీ ఆలయ పునర్నిర్మాణ పనులకు శృంగేరి పిఠాధిపతి ఈనెల 24న అనుమతి ఇవ్వడంతో  ముహూర్తం ఖరారైందని ఆలయ ఈఓ విజయరామారావు, స్థానచార్యులు ప్రవీణ్‌కుమార్‌, ఆలయ ఛైర్మన్‌ శరత్‌పాఠక్‌లు పేర్కొన్నారు. గురువారం బాసర ఆలయంలోని వేములవాడ అతిథిగృహంలో ఏర్పాటు చేసిన విలేకర్ల సమావేశంలో వారు మాట్లాడారు. శుక్రవారం అమ్మవారికి వేదపండితులు ప్రత్యేక పూజలు చేసిన అనంతరం మంత్రి ఇంద్రకరణ్‌రెడ్డి, ఎమ్మెల్యే విఠల్‌రెడ్డి, రాష్ట్ర నీటి పారుదలశాఖ చైర్మన్‌ వేణుగోపాలచారిలు ప్రత్యేక పూజలు చేసి ఆలయ పునర్నిర్మాణ పనులు ప్రారంభించనున్నారు.

రూ.100 కోట్లతో పనులు...

ముఖ్యమంత్రి కేసీఆర్‌, మంత్రి ఇంద్రకరణ్‌రెడ్డి, ఎమ్మెల్యే విఠల్‌రెడ్డిల ప్రత్యేక చొరవతో బాసర ఆలయ పునర్నిర్మాణ పనులకు ఇప్పటికే రూ. వంద కోట్లు మంజూరయ్యాయి. అందులోంచి ప్రభుత్వం రూ.50 కోట్లను విడుదల చేయగా అందులోంచి రూ.8 కోట్లతో ఆలయంలో షెడ్డు, గదుల నిర్మాణ పనులను చేపట్టారు. మిగిలిన నిధులతో పాటు మరో రూ.50 కోట్లతో పనులను చేయనున్నారు. టెండర్లు ఆలస్యం జరిగిన పనులు ఆగవని అధికారులు చెబుతున్నారు.