నీటితొట్టెలో పడి దివ్యాంగ బాలుడి మృతి

నాగ ఆదిత్య (పాతచిత్రం)

అనకాపల్లి పట్టణం, న్యూస్‌టుడే: అనకాపల్లి జిల్లా కేంద్రంలో ఓ మానసిక, శారీరక దివ్యాంగ బాలుడు నీటితొట్టెలో పడి మృతిచెందాడు. పట్టణ పోలీస్‌స్టేషన్‌ ఏఎస్సై అప్పారావు తెలిపిన వివరాల ప్రకారం... విజయరామరాజుపేటలో నివసిస్తున్న రమేష్‌, నాగమణి కుమారుడు గోలి నాగఆదిత్య (10). ఆదివారం మధ్యాహ్నం ఇంట్లో ఆటలాడుకుంటూ ప్రమాదవశాత్తు నీటితొట్టెలో పడిపోయాడు. తల్లి నాగమణి గుర్తించి ఎన్టీఆర్‌ ఆసుపత్రికి తరలించగా అప్పటికే మృతి చెందినట్లు వైద్యులు నిర్ధారించారు. నాగమణి దంపతులకు ఓ కుమారుడు, కుమార్తె ఉన్నారు. కుమారుడి మృతితో వారు రోదిస్తున్న తీరు పలువురిని కలచివేసింది. కేసు నమోదుచేసి దర్యాప్తు చేస్తున్నట్లు పట్టణ ఎస్సై రామకృష్ణ తెలిపారు.