రోడ్డు ప్రమాదంలో ఉప సర్పంచి దుర్మరణం

చింతూరు, న్యూస్‌టుడే: చింతూరు మండలం ఏడుగురాళ్లపల్లి శివారులో జరిగిన రోడ్డు ప్రమాదంలో తుమ్మల ఉప సర్పంచి నాగేశ్వరరావు (32) దుర్మరణం చెందారు. ఎస్సై యాదగిరి తెలిపిన వివరాల ప్రకారం.. ఎటపాక మండలం జగ్గవరంలో శనివారం ఓ వివాహ వేడుకకు ద్విచక్రవాహనంపై నాగేశ్వరరావు, వినోద్‌, మరో వ్యక్తి వెళ్లారు. తిరిగి స్వగ్రామానికి వస్తుండగా ఏడుగురాళ్లపల్లి శివారులో గుర్తు తెలియని వాహనం ఢీకొట్టింది. ఈ ప్రమాదంలో నాగేశ్వరరావు అక్కడికక్కడే మృతి చెందారు. వినోద్‌ కాలు విరిగింది. క్షతగాత్రుడిని భద్రాచలం ఏరియా ఆసుపత్రికి తరలించారు. మరొకరు క్షేమంగా ఉన్నారు. ఈ మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు.