నిధుల్లేని సమావేశాలెందుకు: భాజపా

మాట్లాడుతున్న భాజపా జిల్లా అధ్యక్షులు పాంగి రాజారావు

పాడేరు, న్యూస్‌టుడే: నిధులు లేకుండా పాలకవర్గ సమావేశాలు ఎన్ని పెట్టినా ప్రజలకు ఎటువంటి ప్రయోజనం ఉండదని భాజపా జిల్లా అధ్యక్షులు పాంగి రాజారావు పేర్కొన్నారు. పట్టణంలోని పార్టీ కార్యాలయంలో శనివారం ఏర్పాటు చేసిన విలేకరుల సమావేశంలో ఆయన మాట్లాడుతూ ఐటీడీఏలో అందుబాటులో ఉన్న నిధులను ప్రభుత్వం ఖాళీ చేసిందన్నారు. ఎస్టీ కార్పొరేషన్‌ నిధులు మళ్లించడం ద్వారా మూడేళ్లుగా ఒక్క గిరిజనుడికి రాయితీపై ఎటువంటి పరికరాలు అందించలేదన్నారు. గత పాలకవర్గంలో చర్చించిన సమస్యలు ఎన్ని పరిష్కరించారో తెలియజేయాలన్నారు. మన్యంలో సమస్యలు రోజురోజుకు పెరుగుతున్నాయని చెప్పారు. కేంద్రం నుంచి ఐటీడీఏకు భారీగా నిధులు వస్తున్నా, వాటిని ఎందుకోసం ఖర్చు చేస్తున్నారో తెలియడం లేదని పేర్కొన్నారు. దీనిపై ప్రజలకు సమాధానం చెప్పాలని డిమాండ్‌ చేశారు. భాజపా నాయకులు రాఘవేంద్రరావు, రామకృష్ణ, రవికుమార్‌, మత్స్యకొండబాబు, మోహన్‌రావు, అబ్బులు, హరి తదితరులు పాల్గొన్నారు.