కలువ పూలు కొయ్యబోయి.. నిండుప్రాణం బలి

నర్సీపట్నం గ్రామీణం, న్యూస్‌టుడే: భవాని దీక్షలో ఉన్న భార్య కోరడంతో కలువ పూలు కోసేందుకు చెరువు వద్దకు వెళ్లిన భర్త ప్రమాదవశాత్తూ నీట మునిగి చనిపోయిన ఘటన నర్సీపట్నం మండలం ఆర్డనరీ లక్ష్మీపురంలో చోటుచేసుకుంది. ఎస్సై రామారావు కథనం ప్రకారం.. ఆరిపాక వెంకటరమణ (74) బార్బరుగా పనిచేస్తూ జీవనం సాగిస్తున్నాడు. ఆయన భార్య సత్యవతి దుర్గాదేవి భక్తురాలు. భవానిమాల ధరించి దీక్ష చేస్తోంది. పూజకు అవసరమైన కలువ పూలు స్థానిక పెద్దచెరువు నుంచి సేకరించేందుకు బుధవారం సాయంత్రం వెళ్లి తిరిగిరాలేదు. గురువారం ఉదయం ఎనిమిది గంటల సమయంలో వృద్ధుడు మృతదేహం చెరువులో తేలడంతో కుటుంబ సభ్యులు కన్నీరుమున్నీరయ్యారు. మృతదేహాన్ని ప్రాంతీయ ఆసుపత్రికి తరలించారు.