కుంకంపూడి కొండలో కొత్త గుహలు

వెలుగు చూసిన గుహ

గూడెంకొత్తవీధి, న్యూస్‌టుడే: మన్యం సహజసిద్ధ అందాలకు నిలయం. ఎప్పటికప్పుడు ఇక్కడ కొత్త అందాలు వెలుగులోకి వస్తున్నాయి. గూడెంకొత్తవీధి మండలం కుంకంపూడి కొండపై ఆరు గుహలు కొత్తగా వెలుగు చూశాయి. సుమారు 80 అడుగుల ఎత్తులో ఉన్న ఈ గుహలను గూడెంకొత్తవీధికి చెందిన యువకుల బృందం బయటపెట్టింది. గూడెంకొత్తవీధి మండల కేంద్రానికి నాలుగు కిలోమీటర్ల దూరంలోని తీములబంద, కుంకంపూడి గ్రామాల మధ్య ఉన్న ఈ కొండపై గుహలు ఉన్నట్లు గూడెంకొత్తవీధికి చెందిన యువకులకు సమాచారం అందింది. కొర్ర నారాయణరావు, లకే రామచంద్రుడు, పూజారి లీలాప్రసాద్‌, శంకర్‌రావు, కాళీచరణ్‌, వంతల వరప్రసాద్‌ బృందంగా ఏర్పడి ఈ కొండపైకి సోమవారం ఉదయం బయల్దేరారు. తీములబంద దాటాక మొదటి మలుపు నుంచి కుడివైపుగా కాఫీతోటల మీద నుంచి కొండపైకి వెళ్లారు. సుమారు 80 అడుగుల ఎత్తుకు వెళ్లాక ఆరు గుహలు కనిపించాయి. వాటిలో కొన్ని రాళ్లతో మూసివేసి ఉన్నాయి. కొన్నింటి లోపలకు వెళ్లి అక్కడి చిత్రాలను కెమెరాల్లో బంధించారు. ఈ గుహలను అభివృద్ధి చేస్తే ఈ ప్రాంతం మరింతగా ప్రాచుర్యంలోకి వస్తుందని యువకులు పేర్కొన్నారు.

గుహలోపలకు వెళ్లొచ్చిన గూడెంకొత్తవీధి యువకులు