గడప గడపకు.. వంద రోజులు పూర్తి

సంక్షేమ పథకాలను వివరిస్తున్న ఎమ్మెల్యే ఫాల్గుణ

అరకులోయ, న్యూస్‌టుడే: ప్రజా సంక్షేమ పథకాలతో పేదలను ఆర్థికంగా బలోపేతం చేయడమే వైకాపా ప్రభుత్వ  ధ్యేయమని ఎమ్మెల్యే చెట్టి ఫాల్గుణ అన్నారు. పద్మాపురం పంచాయతీ బొండంగుడ, పింపల్‌గుడ, శారద బొందుగుడ గ్రామాల్లో బుధవారం గడప గడపకు మన ప్రభుత్వం కార్యక్రమాన్ని నిర్వహించారు. ఈ సందర్భంగా ఎమ్మెల్యే ఫాల్గుణ మాట్లాడుతూ నవరత్నాల కార్యక్రమంలో భాగంగా అమలుచేస్తున్న సంక్షేమ పథకాలతో పేదలు ఆర్థికంగా బలోపేతం అవుతారన్నారు. ప్రతి కుటుంబానికి ఏడాదికి రూ. లక్షకు పైగా అందించేలా వివిధ పథకాల్లో భాగస్వాములను చేస్తున్నామన్నారు. ఈ సందర్భంగా ఆయా గ్రామాల్లోని కుటుంబాలకు ప్రభుత్వం అందించిన సంక్షేమ పథకాలు వివరించారు. గడప గడపకు మన ప్రభుత్వం వంద రోజులు పూర్తి చేసుకున్న సందర్భంగా ఎమ్మెల్యే ఫాల్గుణ కేక్‌ కోసి పంచిపెట్టారు. వైకాపా నాయకులు, అధికారులు పాల్గొన్నారు.