జీతాలివ్వకపోతే ఎలా బతుకుతారు?

కార్మికులకు ఆర్థికసాయం అందిస్తున్న ఎమ్మెల్సీ ఐవీ

రంపచోడవరం, న్యూస్‌టుడే: సత్యసాయి తాగునీటి పథకం కార్మికుల సమస్యలను ప్రభుత్వం వెంటనే పరిష్కరించాలని ఎమ్మెల్సీ ఐ.వెంకటేశ్వరరావు డిమాండ్‌ చేశారు. కార్మికులు రిలే నిరాహార దీక్ష చేస్తున్నా ప్రభుత్వం పట్టించుకోకపోవడం దారుణమన్నారు. స్థానిక ఐటీడీఏ కార్యాలయం ఎదుట కార్మికులు చేస్తున్న దీక్షలు సోమవారం 12వ రోజుకు చేరాయి. ఎమ్మెల్సీ దీక్షాశిబిరాన్ని సందర్శించి కార్మికులకు సంఘీభావం తెలిపారు. కార్మికుల అవసరాల నిమిత్తం రూ.6,350 ఆర్థికసాయం అందచేశారు. ఆయన మాట్లాడుతూ పది నెలలుగా జీతాలు ఇవ్వకపోతే భార్య, పిల్లలతో ఎలా బతుకుతారని ప్రశ్నించారు. అనంతరం పీవో గనోరేను కలిసి వినతిపత్రం అందించారు. సీఐటీయూ జిల్లా నాయకురాలు మట్ల వాణిశ్రీ, యూటీఎఫ్‌ జిల్లా అధ్యక్షుడు విల్సన్‌బాబు, ప్రతినిధులు సనాతన్‌బాబు, సూరిబాబు, వెంగళరావు, టాల్‌స్టాయ్‌, అనిల్‌బాబు తదితరులు పాల్గొన్నారు.