రోడ్డు ప్రమాదంలో భర్త దుర్మరణం.. భార్యకు తీవ్రగాయాలు

దేవరాపల్లి, కె.కోటపాడు: దేవరాపల్లి - కొత్తవలస రోడ్డులో గుడిపాల జంక్షన్‌ వద్ద శుక్రవారం జరిగిన రోడ్డు ప్రమాదంలో ఒకరు మృతి చెందగా, ముగ్గురు గాయపడ్డారు. ఎస్సై నాగేంద్ర కథనం ప్రకారం రెండు మోపెడ్లపై వస్తున్న నలుగురిని కొత్తవలస వైపు నుంచి ఎదురుగా వస్తున్న జీపు ఢీకొట్టింది. విజయనగరం జిల్లా వేపాడ మండలం చినగుడిపాలకు చెందిన బాలిబోయిన సన్నిబాబు (52) మృతి చెందగా, ఆయన భార్య దేముడమ్మకు తీవ్ర గాయాలయ్యాయి. మరో మోపెడ్‌పై వస్తున్న వేపాడ మండలం భర్తవానిపాలెంకు చెందిన లక్ష్మణ, సంజీవరావు గాయపడ్డారు. క్షతగాత్రులను కె.కోటపాడు సీహెచ్‌సీకి తరలించారు. అక్కడ్నుంచి మెరుగైన వైద్యం కోసం కేజీహెచ్‌కు పంపారు.