స్పందన ఫిర్యాదులను పరిష్కరించండి

సమస్యలు వింటున్న ఐటీడీఏ పీఓ సూరజ్‌ గనోరే, సబ్‌ కలెక్టర్‌ శుభం బన్సల్‌

రంపచోడవరం, న్యూస్‌టుడే: స్పందనలో గిరిజనులు విన్నవించిన సమస్యల పరిష్కారానికి సంబంధిత అధికారులు తక్షణ చర్యలు తీసుకోవాలని ఐటీడీఏ పీవో సూరజ్‌గనోరే ఆదేశించారు. సోమవారం స్థానిక ఐటీడీఏ సమావేశ మందిరంలో సబ్‌ కలెక్టర్‌ శుభం బన్సల్‌, ఏపీవో శ్రీనివాసరావుతో కలసి ఆయన స్పందన కార్యక్రమాన్ని నిర్వహించారు. ఈ సందర్భంగా 70 మంది వివిధ సమస్యలపై వినతులు అందజేశారు. లోతట్టు గ్రామాలకు రహదారులు వేయాలని, తాగునీటి ట్యాంకులు ఏర్పాటు చేయాలని పలువురు విన్నవించారు. పోలవరం ప్రాజెక్టు నిర్మాణంతో ముంపునకు గురవుతున్న తమకు ఆర్‌అండ్‌ఆర్‌ ప్యాకేజీ చెల్లించాలని పలువురు నిర్వాసితులు వినతిపత్రం అందజేశారు. ఇన్‌ఛార్జి ఏడీఎంహెచ్‌వో రాధిక, ప్రాంతీయ ఆసుపత్రి సూపరింటెండెంట్‌ కల్పన, విద్యుత్తు ఈఈ యూసఫ్‌, పీఆర్‌ డీఈ దుర్గాప్రసాద్‌, ఎంపీడీవో కుమార్‌బాబు పాల్గొన్నారు.