శ్రమదానంతో రహదారి బాగు

పెదగొంది నుంచి కృష్ణాపురం వరకు రహదారి
బాగు చేసుకుంటున్న గ్రామస్థులు

చింతపల్లి గ్రామీణం, న్యూస్‌టుడే: గోతులు, రాళ్లమయంగామారిన రహదారిని శ్రమదానంతో బాగు చేసుకుంటున్నారు పెదగొంది గ్రామ గిరిజనులు. పెదబరడ పంచాయతీ పెదగొందిలో సుమారు 30 పీవీటీజీ గిరిజన కుటుంబాలు నివసిస్తున్నాయి. ప్రధాన రహదారిపై కృష్ణాపురం నుంచి సుమారు రెండు కిలోమీటర్ల దూరంలో ఉంది ఈ గ్రామం. ఈ గ్రామానికి వెళ్లే రహదారి అస్తవ్యస్తంగా ఉంది. బడి, గుడి, ఆసుపత్రికి వెళ్లాలంటే 2 కిలోమీటర్ల దూరంలోని కృష్ణాపురం నడిచి వెళ్లాల్సిందే. ఈ గ్రామంలో ఇంతవరకు ఒక్క ప్రభుత్వ భవన నిర్మాణమూ జరగలేదు. నిత్యావసర సరకులు సరఫరా చేసే వాహనం కూడా ఇక్కడకు రాలేని పరిస్థితి. దీనిపై అధికారులకు స్థానికులు ఎన్నిసార్లు ఫిర్యాదు చేసినా ఫలితం లేదు. దీంతో యువకులంతా కలసి గోతులు, రాళ్లతో నిండిన రహదారిని బాగు చేసుకుంటున్నారు. నిత్యావసర సరకుల వాహనమైనా తమ గ్రామానికి వస్తుందని ఆశతో ఈ కార్యక్రమాన్ని తలపెట్టామని గ్రామస్థులు గెమ్మెలి రమణ, పాంగి కామేశ్వరరావు, సుబ్బారావు చెప్పారు. ఇప్పటికైనా ఉన్నతాధికారులు స్పందించి తారురోడ్డు సౌకర్యం కల్పించాలని కోరుతున్నారు.