అనారోగ్యంతో బాలిక మృతి

శాంతి మృతదేహం

హుకుంపేట, న్యూస్‌టుడే: హుకుంపేట మండలం గత్తుం పంచాయతీకి చెందిన పదేళ్ల బాలిక సోమవారం అనారోగ్యంతో ఆసుపత్రిలో చికిత్స పొందుతూ మృతి చెందింది. గాలిపాడు గ్రామానికి చెందిన వళ్లాయి అప్పన్న, మల్లమ్మల కుమార్తె వల్లాయి శాంతి గ్రామంలోని పాఠశాలలో నాలుగో తరగతి చదువుతోంది. కొన్ని రోజులుగా ఈ బాలిక ఆరోగ్యం బాగోలేక పోవటంతో తల్లిదండ్రులు విశాఖ కేజీహెచ్‌కు తరలించి వైద్య సేవలు అందిస్తున్నారు. పాప ఆరోగ్యం బాగోలేదని.. ఆర్థికంగా ఆదుకోవాలని తల్లిదండ్రులు పాడేరు కలెక్టర్‌ సుమిత్‌కుమార్‌ను కలిశారు. కలెక్టర్‌ స్పందించి ఖర్చుల నిమిత్తం రూ. 5 వేలు సహాయం అందించాలని కార్యాలయంలో ఉన్న వరుణ్‌కుమార్‌కు సూచించారని.. అయితే ఆయన రూ. వెయ్యి ఇచ్చి పంపించారని పాప తల్లిదండ్రులు పేర్కొన్నారు. కేజీహెచ్‌లో సక్రమంగా వైద్యం అందక, ప్రైవేట్‌ ఆసుపత్రుల్లో చూపించుకోనే స్థోమత లేకపోవడంతోనే తమ కుమార్తె ఆరోగ్యం క్షీణించి మృతి చెందిందని వారు రోదించారు.