పరిహారం ఇప్పించరూ..

కలెక్టర్‌ను కలిసేందుకు వచ్చిన బాధిత కుటుంబసభ్యులు

పాడేరు, న్యూస్‌టుడే: గత నెల తొమ్మిదో తేదీన కాకినాడ జిల్లా పెద్దాపురం మండల రాగంపేటలోని ఆయిల్‌ కంపెనీలో చోటుచేసుకున్న ప్రమాదంలో మృతి చెందిన ఐదుగురు గిరిజనుల కుటుంబాలకు ఇప్పటివరకు ప్రభుత్వం, కంపెనీ నుంచి ఎటువంటి నష్ట పరిహారం అందలేదు. ఈ క్రమంలో సోమవారం వీరంతా కలెక్టర్‌ సుమిత్‌కుమార్‌ను కలిసి పరిహారం త్వరగా అందేలా చర్యలు తీసుకోవాలని కోరారు. ఆ ప్రమాదంలో పెదబయలు మండలం లక్ష్మిపురం, వంచెడిపుట్టు, చెంపపుట్టు గ్రామానికి చెందిన వెచ్చంగి కృష్ణారావు, వెచ్చంగి సాగర్‌, వెచ్చంగి నరసింహరావు, కుర్తాడి బొంజన్న, రామారావు మృతి చెందారు. ఒక్కో కుటుంబానికి రూ.50 లక్షల వరకు నష్ట పరిహారం ఇచ్చేందుకు నిర్ణయించారు. ఇందులో రూ.25 లక్షలు రాష్ట్ర ప్రభుత్వం, కంపెనీ మరో రూ.25 లక్షలు ఇవ్వాల్సి ఉంది. ప్రమాదం జరిగి దాదాపు 40 రోజులు దాటుతున్నా బాధిత కుటుంబాలకు పరిహారం అందలేదు.