అనారోగ్యంతో కిండలం విలవిల పది రోజుల్లో అయిదుగురి మృతి

పెదబయలు, న్యూస్‌టుడే: పెదబయలు మండలం కుంతుర్ల పంచాయతీ కిండలంలో పది రోజుల్లో అనారోగ్యంతో అయిదుగురు మృతిచెందారు. వీరిలో ఓ చిన్నారితో పాటు 65 ఏళ్ల వృద్ధురాలు ఉన్నారు. వివరాల్లోకి వెళితే.... కిండలం గ్రామంలో ఒకే వీధిలో ఉంటున్న 65 ఏళ్ల వృద్ధురాలు అనారోగ్యంతో బాధపడుతూ పది రోజుల క్రితం మృతిచెందారు. ఆ తరువాత అదే కుటుంబానికి చెందిన కిముడు బోడంనాయుడు(50) అనే వ్యక్తి మృతిచెందాడు. ఇదే కుటుంబంలో రెండు నెలల చిన్నారి సైతం అనారోగ్యంతో బాధపడుతూ మృతిచెందిందని గ్రామస్థులు తెలిపారు. కొద్దిరోజులుగా అనారోగ్యంతో బాధపడుతున్న కిముడు కృష్ణారావు(48), కిముడు రామ్మూర్తి(60) కూడా మృతిచెందారు. ప్రస్తుతం గ్రామంలో మరో ముగ్గురు అనారోగ్యంతో బాధపడుతుండగా, వీరిలో ఒకరిని పాడేరు ఏరియా ఆసుపత్రికి తరలించారు. మరింత మంది ఇబ్బంది పడకుండా నేపథ్యంలో వైద్యసిబ్బంది ప్రత్యేక వైద్యసేవలందించాలని గ్రామస్థులు కోరుతున్నారు.