కారును ఢీకొన్న దురంతో.. పలు రైళ్ల ఆలస్యం

విశాఖపట్నం, న్యూస్‌టుడే: భీమడోలు సమీపంలోని లెవిల్‌ క్రాసింగ్‌ వద్ద రైలు పట్టాలపైకి వచ్చి నిలిచిపోయిన కారును సికింద్రాబాద్‌ నుంచి విశాఖపట్నం వెళ్తున్న దురంతో సూపర్‌ఫాస్ట్‌ ఎక్స్‌ప్రెస్‌ గురువారం ఢీ కొట్టింది. ఈ ప్రమాదంలో ఏ విధమైన ప్రాణ నష్టం జరగకపోయినప్పటికీ బొలెరో వాహనం నుజ్జయింది. దీంతో      ఆ మార్గంలో పలు రైళ్ల రాకపోకలకు తీవ్ర అంతరాయం ఏర్పడింది.  విజయవాడ నుంచి విశాఖ వైపు వచ్చే పలు రైళ్లు దాదాపు 3 గంటలకు పైగా ఆలస్యంగా నడిచాయి. రైళ్లు గంటల తరబడి నిలిచిపోవడంతో గురువారం రాత్రి 9 గంటలకు విశాఖ నుంచి బయలుదేరి వెళ్లాల్సిన విశాఖ- కోర్బా ఎక్స్‌ప్రెస్‌ అర్ధరాత్రి దాటిన తరువాత 1.25 గంటలకు బయలుదేరి వెళ్లేలా మార్పు చేశారు. గురువారం విశాఖ చేరుకోవాల్సిన అల్పూజా-దన్‌బాద్‌ బొకారో, బెంగళూరు-భువనేశ్వర్‌ ప్రశాంతి, విజయవాడ- విశాఖ రత్నాచల్‌, కడప-విశాఖ తిరుమల  ఎక్స్‌ప్రెస్‌ రైళ్లతో పాటు మరికొన్ని వారాంతపు రైళ్లు సైతం ఆలస్యంగా నడిచాయి.

సికింద్రాబాద్‌-అగర్తలా ప్రత్యేక రైలు

ప్రయాణికుల రద్దీని దృష్టిలో ఉంచుకొని సికింద్రాబాద్‌-అగర్తలాకు(ఒక వైపు మాత్రమే) ప్రత్యేక రైలును నడపనున్నట్లు వాల్తేర్‌ సీనియర్‌ డీసీఎం ఏ.కె. త్రిపాఠి తెలిపారు. సికింద్రాబాద్‌-అగర్తలా(07018) ప్రత్యేక రైలు ఏప్రిల్‌ 2న ఉదయం 11 గంటలకు  సికింద్రాబాద్‌లో బయలుదేరి మంగళవారం రాత్రి 11.15 గంటలకు అగర్తలా చేరుకోనున్నట్లు పేర్కొన్నారు. ప్రయాణికులు గమనించి   ఈ రైలు సేవల్ని వినియోగించుకోవాలని కోరారు.