మూడు రోజులైంది.. మంచినీళ్లొచ్చి!

కార్యాలయ పరిపాలన అధికారికి వినతిపత్రం అందిస్తున్న మహిళలు

మారేడుమిల్లి, న్యూస్‌టుడే: వేసవి ఎండలతో సతమతమవుతున్న సమయంలో గుక్కెడు తాగునీరు అందించకపోతే బతికేదెలాగంటూ మారేడుమిల్లి చెలకవీధికి మహిళలు ఆగ్రహం వ్యక్తం చేశారు. నీటి సరఫరా పునరుద్ధరించాలంటూ సోమవారం మండల పరిషత్తు కార్యాలయం ఎదుట ధర్నాకు దిగారు. చెలకవీధికి మూడు రోజులుగా పంచాయతీ నీటి సరఫరా నిలిచిపోయింది. దీంతో కనీసం వాడుకోవడానికి కూడా నీళ్లు లేకపోవడంతో మహిళలు తీవ్ర అవస్థలు పడుతున్నారు. తరచూ ఇదే పరిస్థితి నెలకొంటుండటంతో వారిలో ఆగ్రహం కట్టలు తెంచుకుంది. మహిళలంతా మండల పరిషత్తు కార్యాలయం ఎదుట ధర్నాకు దిగారు. నీటి సరఫరా పునరుద్ధరించాలని నినాదాలు చేశారు. కార్యాలయ ఏవో రమణమూర్తికి వినతిపత్రం అందించారు.