చాపరాయి సుందరీకరణకు చర్యలు

చాపరాయిలో మాట్లాడుతున్న ఐటీడీఏ పీవో అభిషేక్‌

డుంబ్రిగుడ, న్యూస్‌టుడే: పర్యాటక కేంద్రం చాపరాయి జలవిహారిలో సమూల మార్పులు చేసి మరింత సుందరంగా తీర్చిదిద్దనున్నట్లు ఐటీడీఏ పీవో అభిషేక్‌ పేర్కొన్నారు. చాపరాయి జలవిహారిని బుధవారం ఆయన సందర్శించారు. సౌకర్యాల కల్పనపై ఇంజినీరింగ్‌ అధికారులతో మాట్లాడారు. గార్డెన్‌, మరుగుదొడ్లు, దుస్తులు మార్చుకునే గదుల పునర్నిర్మాణానికి ప్రతిపాదనలు తయారు చేయాలని ఇంజినీరింగ్‌ అధికారులను ఆదేశించారు. ఎకో టూరిజం ద్వారా అభివృద్ధికి చర్యలు చేపట్టనున్నామని తెలిపారు. స్థానిక యువతకు ఉపాధి కల్పించాలని వైకాపా మండల అధ్యక్షుడు గోపాల్‌ విన్నవించారు. ఇంజినీరింగ్‌ అధికారులు తదితరులు పాల్గొన్నారు.

అభివృద్ధి పనులు త్వరితగతిన పూర్తి చేయండి

అరకులోయ, న్యూస్‌టుడే: పద్మాపురం ఉద్యానంలో చేపట్టిన అభివృద్ధి పనులను త్వరితగతిన పూర్తి చేసి పర్యాటకులకు అందుబాటులోకి తీసుకురావాలని పీవో అభిషేక్‌ ఆదేశించారు. పద్మాపురం ఉద్యానాన్ని బుధవారం ఆయన పరిశీలించారు. కొత్తగా నిర్మిస్తున్న కాటేజీలు, రెస్టారెంట్‌లను పరిశీలించారు. పగోడాలు, రెస్టారెంట్‌, గిరి బజార్‌ల పనులు వేగవంతం చేయాలన్నారు. మ్యూజియం మేనేజర్‌ మురళి, పద్మాపురం ఉద్యానం మేనేజర్‌ బొంజుబాబు తదితరులు పాల్గొన్నారు.