మా దాహం కేకలు వినిపిస్తున్నాయా..!

ఖాళీ బిందెలతో మహిళల ఆందోళన

హుకుంపేట, న్యూస్‌టుడే: ఎండ ఠారెత్తిస్తుండటంతో భూగర్భ జలాలు అడుగంటిపోతున్నాయి. కాలువలు, బావులు, బోర్లు, గెడ్డలు, ఊటల్లో నీరు ఎండిపోయి తాగునీటికి ప్రజలు అల్లాడుతున్నారు. కొన్ని గ్రామాల్లో మహిళలు కిలోమీటర్ల దూరం వెళ్లి నీరు తెచ్చుకుంటున్నారు. హుకుంపేట మండలంలోని కొంతలి పంచాయతీ ముంచంగిపుట్టులో ఉన్న సోలార్‌ నీటి పథకం పాడైంది. నీరు అందక తీవ్ర ఇబ్బందులు పడుతున్నామని స్థానికులు ఆవేదన వ్యక్తం చేస్తున్నారు. ఖాళీ బిందెలతో శుక్రవారం మహిళలు ఆందోళన చేపట్టారు. గ్రామంలో జల్‌జీవన్‌ పథకం ద్వారా బోర్లు ఏర్పాటు చేసి, వాటికి పంపులు బిగించలేదన్నారు. సంబంధిత అధికారులు స్పందించాలని స్థానికులు కోరుతున్నారు.