మలుపులో నిలిచిన కంటెయినర్‌

అనంతగిరి, న్యూస్‌టుడే: అనంతగిరి ఘాట్‌రోడ్డులో భారీ కంటెయినర్‌ నిలిచిపోవడంతో రాకపోకలకు తీవ్ర అంతరాయం ఏర్పడింది. స్థానికులు అందించిన వివరాల మేరకు... అరకులోయ ప్రాంతం వైపు నుంచి మైదాన ప్రాంతానికి వెళుతున్న భారీ కంటెయినర్‌ కొదమగుడ సమీపంలోని మలుపు వద్ద అడ్డంగా నిలిచిపోయింది. మలుపు తిరిగే సమయంలో వాహనం భారీగా ఉండటంతో వెనుక చక్రాలు రోడ్డుపై నుంచి కిందకు వర్షపు నీరు పారే కాలువలోకి దిగిపోయాయి. దీంతో లారీ ఓ వైపునకు ఒరిగిపోయి ముందుకు కదిలేందుకు వీల్లేకుండా ఉండిపోయింది. మలుపు కావటంతో మిగతా వాహనాల రాకపోకలకు ఇబ్బందులు ఏర్పడ్డాయి.