ప్రతి ఫిర్యాదూ పరిష్కరించాల్సిందే: కలెక్టర్‌

వినతులు స్వీకరిస్తున్న కలెక్టర్‌ సుమిత్‌కుమార్‌, పీఓ వి.అభిషేక్‌, జేజీ శివ శ్రీనివాసు తదితరులు

పాడేరు పట్టణం, న్యూస్‌టుడే: స్పందనలో అందిన ప్రతి ఫిర్యాదును పరిష్కరించాల్సిందేనని జిల్లా కలెక్టర్‌ సుమిత్‌కుమార్‌ స్పష్టం చేశారు. శుక్రవారం స్థానిక ఐటీడీఏ సమావేశ మందిరంలో జరిగిన స్పందన కార్యక్రమంలో కలెక్టర్‌ మాట్లాడుతూ అందిన ప్రతి ఫిర్యాదుకు విచారణాధికారిని నియమించాలన్నారు. విచారణ అనంతరం చేపట్టిన పరిష్కార వివరాలను ఫిర్యాదుదారునికి తెలియజేయాలని సూచించారు. ప్రతి అధికారి, సిబ్బంది తప్పనిసరిగా ముఖ ఆధారిత హాజరు నమోదు చేయాలన్నారు. స్పందనలో 139 ఫిర్యాదులు అందాయి. అరకులోయ మండలం కొత్తభల్లుగుడ పంచాయతీ రవ్వలగూడ గ్రామానికి చెందిన దురియా రామచందర్‌ జాతీయ రహదారి నిర్మాణంలో భాగంగా కోల్పోతున్న భూమికి పరిహారం ఇప్పించాలని కోరారు. కొయ్యూరు మండలం కొండగోకరి పంచాయతీ రత్నంపేటలో సీఆర్టీగా పనిచేస్తూ మృతి చెందిన రాజబాబు స్థానంలో తనకు ఏదైనా పాఠశాలలో అవకాశం కల్పించాలని అతడి భార్య ఎర్రమ్మ వినతిపత్రం అందజేశారు. పాడేరుకు చెందిన కె.మధు తాగునీటి సమస్య పరిష్కరించాలని కోరారు. హుకుంపేట మండలం రంగశీల పంచాయతీ ఒంటిపాక గ్రామానికి చెందిన జి.మల్లేశ్వరరావు ఇల్లు మంజూరు చేయాలని కోరారు. పాడేరు మండలం గబ్బంగి పంచాయతీ గబ్బంగి గ్రామానికి చెందిన తమర్బ భవాని, వెంకటరమణ అటవీ హక్కు పత్రాలు అందజేయాలని విన్నవించారు. ఐటీడీఏ పీఓ వి.అభిషేక్‌, సంయుక్త కలెక్టర్‌ శివ శ్రీనివాసు, అసిస్టెంట్‌ కలెక్టర్‌ అశుతోష్‌ శ్రీ వాత్సవ, డీఆర్‌ఓ అంబేడ్కర్‌, జిల్లా, డివిజన్‌స్థాయి అధికారులు పాల్గొన్నారు.