‘ఉగాది పురస్కారాల ఎంపికలో అన్యాయం’

పాడేరులో గ్రామ వాలంటీర్ల నిరసన

పాడేరు, న్యూస్‌టుడే: ఉగాది పురస్కారాలు అందించడంలో తమకు అన్యాయం జరిగిందని జిల్లా వాలంటీర్ల సంఘం అధ్యక్షుడు రాంబాబు ఆవేదన వ్యక్తంచేశారు. పురస్కారాలకు ఎంపికవని వాలంటీర్లతో శుక్రవారం పాడేరులో నిరసన చేపట్టారు. ఈ సందర్భంగా ఆయన మాట్లాడుతూ.. ఏటా వాలంటీర్ల సేవలను గుర్తించి ఉగాది సందర్భంగా సేవా వజ్ర, సేవా మిత్రా, సేవా రత్న అవార్డులు, నగదు ప్రోత్సాహకాలు అందించేవారన్నారు. ఈ ఏడాది నెల ఆలస్యంగా విజయవాడలో అందించిన ఈ పురస్కారాలకు ఎంపికలో అల్లూరి జిల్లా వాలంటీర్లకు తీరని అన్యాయం జరిగిందన్నారు. జిల్లావ్యాప్తంగా 352 సచివాలయాల పరిధిలో సుమారు 5,547 మంది వాలంటీర్లు పనిచేస్తున్నట్లు చెప్పారు. వీరిలో కేవలం 3,100 మందిని సేవా మిత్ర, 58 మందిని సేవా రత్న, 108 మందిని సేవా వజ్ర అవార్టులకు ఎంపిక చేసినట్లు చెప్పారు. పురస్కారాలకు ఎంపికవని వాలంటీర్లంతా కలెక్టర్‌ సుమిత్‌కుమార్‌ను కలిసి వినతిపత్రం సమర్పించారు.