కోర్టుకు హాజరు కాని అధికారులకు వారెంట్లు

మచిలీపట్నం కార్పొరేషన్‌, న్యూస్‌టుడే: సమన్లు అందుకుని కోర్టుకు హాజరుకాని అధికారులకు బెయిలబుల్‌ వారెంట్లు జారీ చేస్తూ ఆరో అదనపు జిల్లాజడ్జి చినబాబు మంగళవారం ఆదేశాలిచ్చారు. కృత్తివెన్ను మండలపరిధిలోని చినగొల్లపాలెం గ్రామంలో మే 13, 2017న జరిగిన వివాహిత మృతికేసుపై కోర్టులో విచారణ జరుగుతుంది. శవపంచనామా చేసిన అప్పటి కృత్తివెన్ను తహసీల్దారు భరత్‌రెడ్డి, దర్యాప్తుచేసిన ఎస్సై పి.లవరాజు, డీఎస్పీలు డి.సూర్యశ్రావణ్‌కుమార్‌, ఎండీ మెహబూబ్‌బాషాలను విచారణకు మంగళవారం హాజరుకావాలని ఈ నెల 22న కోర్టు సమన్లు జారీ చేసింది. వారు హాజరు కాకపోవడంతో ఆ నలుగురు అధికారులకు వారెంట్‌లు జారీ చేస్తూ న్యాయమూర్తి కేసును జులై 5వతేదీకి వాయిదా వేశారు.