Vijayawada: విజయవాడలో గంజాయి బ్యాచ్‌ సభ్యుల వీరంగం

రోడ్డుపై కొట్టుకుంటున్న గంజాయి బ్యాచ్‌ సభ్యులు

గాంధీనగర్‌, న్యూస్‌టుడే: విజయవాడలోని స్థానిక ఐలాపురం హోటల్‌ సెంటర్‌లో సోమవారం రాత్రి గంజాయి బ్యాచ్‌ సభ్యులు వీరంగం సృష్టించడంతో స్థానికులు, వ్యాపారులు భయభ్రాంతులకు గురయ్యారు. చిత్తుకాగితాలు ఏరుకునే ఎన్‌.రాఘవ, వెంకటరత్నంల మధ్య మాటా మాటా పెరిగి రోడ్డుమీద గంజాయి మత్తులో కర్రలతో కొట్టుకోవడంతో తీవ్ర గాయాలయ్యాయి. వాహనచోదకులు భయాందోళనతో పరుగులు తీశారు. స్థానికులు పోలీసులకు సమాచారం అందించారు. సత్యనారాయణపురం పోలీసులు వారిని అదుపులోకి తీసుకొని ప్రభుత్వాసుపత్రికి తరలించారు. సాంబమూర్తి రోడ్డులో బ్లేడ్‌ బ్యాచ్‌, గంజాయి బ్యాచ్‌ సభ్యుల అరాచకాలు ఎక్కువగా ఉంటున్నాయని ప్రతి రోజూ గొడవలు జరుగుతున్నాయని స్థానికులు ఆందోళన వ్యక్తం చేస్తున్నారు. ఈ ప్రాంతంలో రాత్రి సమయంలో పోలీసు నిఘా ఏర్పాటు చేయాలని కోరుతున్నారు.