ఆంధ్రా ఆసుపత్రి నవజాత శిశువుల ఐసీయూకు గుర్తింపు

సూర్యారావుపేట, న్యూస్‌టుడే : ఆంధ్రా హాస్పిటల్స్‌ నవజాత శిశువుల విభాగానికి నేషనల్‌ నియోనాటాలజీ ఫోరమ్‌ అత్యంత ప్రతిష్ఠాత్మకమైన లెవెల్‌ 3బి గుర్తింపు ఇచ్చింది. దేశంలో మొత్తం 8 సెంటర్లు మాత్రమే ఈ గుర్తింపు పొందగా.. రాష్ట్రంలో మొదటిసారిగా ఆంధ్రా హాస్పిటల్స్‌కు ఈ గుర్తింపు వచ్చింది. అత్యంత ఆధునిక పరికరాలు, నేర్పు, అనుభవం కలిగిన వైద్యులు, సిబ్బంది, నవజాత శిశువుల శస్త్రచికిత్సలు, గుండె శస్త్రచికిత్సలు ఎక్కవ శాతం విజయవంతంకావడం తదితర అంశాల ప్రాతిపదికగా ఈ గుర్తింపు ఇస్తారు. లెవెల్‌ 3బి గుర్తింపు రావడంపై ఆంధ్రా హాస్పిటల్స్‌ నవజాత శిశువుల, పిల్లల వైద్య బృందానికి, నర్సులకు ఆంధ్రా హాస్పిటల్స్‌ ఎండీ డాక్టర్‌ పి.వి.రమణమూర్తి, డైరెక్టర్‌ డాక్టర్‌ పి.వి.రామారావులు కృతజ్ఞతలు తెలియజేశారు. 23 సంవత్సరాలుగా అంకితభావంతో పనిచేయటం వల్లే ఇది సాధ్యపడిందని వారు తెలిపారు.