కాల్వలో పడి చిన్నారి మృతి

పెనమలూరు, న్యూస్‌టుడే: బంధువుల ఇంటికి వచ్చిన ఓ బాలిక ప్రమాదవశాత్తు బందరుకాల్వలో పడి ప్రాణాలు కోల్పోయింది. పోలీసుల కథనం ప్రకారం.. గన్నవరం సమీపంలో బీబీగూడెంకు చెందిన హెప్సిబా.. తన కుమార్తె సాయిల మిస్సీప్రియ(7)తో  కలిసి శుక్రవారం తాడిగడపలోని బంధువుల ఇంటికి వచ్చారు. శనివారం వేకువజామున బందరు కాల్వ ఒడ్డున వీరిద్దరూ  కాలకృత్యాలు తీర్చుకోవడానికి వెళ్లగా మిస్సీప్రియ ప్రమాదవశాత్తు కాలు జారి బందరు కాల్వలో పడి కొట్టుకుపోయింది. పాప మృతదేహం పెనమలూరు వంతెన వద్ద చెట్లకు చిక్కుకుపోవడంతో స్థానికులు పెనమలూరు పోలీసులకు సమాచారం అందించారు. దీంతో పోలీసులు కుటుంబ సభ్యులకు సమాచారం అందించగా వారు వచ్చి గుర్తించారు. మృతదేహాన్ని పోస్ట్‌మార్టమ్‌కు తరలించి అనుమానాస్పద మృతిగా కేసు నమోదు చేసి దర్యాప్తు చేస్తున్నారు.