బిడ్డకు జన్మనిచ్చిన బాలిక

భర్తపై పోక్సో కేసు నమోదు

చిట్టినగర్‌(విజయవాడ), న్యూస్‌టుడే: బాలిక బిడ్డకు జన్మనివ్వడంతో పోక్సో చట్టం కింద భర్తపై కేసు నమోదు చేసినట్లు విజయవాడ కొత్తపేట పోలీసులు మంగళవారం తెలిపారు. విజయవాడలోని ఒక కాలనీకి చెందిన 17 ఏళ్ల బాలిక, అదే కాలనీకి చెందిన మోహన్‌ అనే యువకుడిని ప్రేమించి 2021 ఫిబ్రవరిలో పెళ్లి చేసుకున్నారు. దీనికి బాలిక తల్లి ఒప్పుకోలేదు. దీంతో ఇంటి నుంచి వెళ్లిపోయిన వీరు అదే కాలనీలో వేరే కాపురం పెట్టారు. 2022 మే నెలలో బాలిక గర్భిణి అని నిర్ధారణ అయ్యింది. ఈ నేపథ్యంలో ఈనెల 5న పురిటి నొప్పులతో బాధపడుతుండగా విజయవాడ పాత ప్రభుత్వ ఆసుపత్రిలో చేర్పించారు. మంగళవారం తెల్లవారుజామున ఆమె మగ బిడ్డకు జన్మనిచ్చింది. ఆసుపత్రి వర్గాలు చిన్న వయస్సులో పెళ్లిపై కొత్తపేట పోలీసులకు సమాచారం అందించారు. దీంతో బాలిక తల్లి నుంచి స్టేట్‌మెంట్‌ తీసుకున్న పోలీసులు మోహన్‌పై పోక్సో కేసు నమోదు చేశారు.